睇完如月既BLOG 見到佢整既鯉魚椰汁年糕 好CUTIE呀
見食譜介紹 都應付得來 ~ 一於整下應應節 !
去二德惠買模具 今日已經好多人喇 相信個個都準備整新年/情人節食品呢 :)
好 ! 來分享下我既作品先
哈哈哈 娛樂金魚眼黎喇 !
出年係虎年 ~ 整左老虎仔個 FRIEND...HELLO KITTY大貓貓 !
呢個椰汁年糕製作好好玩呀, 而且好簡便
加橙色粉漿時可以用喂BB用個D唧筒唧入去 好好玩 嘻嘻 !
先拜個早年, 祝大家年年有餘, 虎虎生威 !
食譜介紹 : 如月既BLOG (多謝分享!)
http://hk.myblog.yahoo.com/MoonCook-MoonLife/article?mid=69953
今日準時收工, 可以回家整下野食喇
想整班蘭蛋糕好耐架喇 今晚一於試下先
不過 ....算半失敗呀 ! 點解? 睇下下面既圖片便可以知道一二 哈哈 !
知道問題在那裡呢 ??
問題就係蛋白裡有蛋黃囉 ..... 原來打發蛋白係一定要沒有蛋黃既
結果蛋白就打唔起 lu (下次都唔好再用分蛋器 > < 用番蛋殼分好了)
雖然蛋白失敗左, 但都照繼續完成 一邊焗 整個廚房都好香蛋糕味 :)
賣相還可以嗎 ?? 第一次試整咋 :)
不過好似唔夠軟身, 唔知如果蛋白ok的話, 係咪會軟滑滑既呢 ??
分享下食譜先
材料
=======================================
蛋黃 3 個 / 細砂糖 30g / 橄欖油 30g / 班蘭精少許
鮮奶 30g / 低筋面粉 60g / 泡打粉 2g
=======================================
蛋白 3個 / 細砂糖 40g (打發蛋白用既)
=======================================
做法
1 將蛋黃加入細砂糖拌勻 然後加入鮮奶/班蘭精&橄欖油拌勻
2 將低筋面粉&泡打粉過篩加入蛋糊中拌勻備用
3 蛋白+細砂糖打發至企身
4 加入蛋糊輕手以fold-in方法拌勻
5 倒進蛋糕模以 170度焗40分鐘即成
下次要再試過 ^^ 都幾好玩 :)
突然心血來潮好想動手整下野
於是去買番d新既衣車針回來
希望新年前可以完成一套新既床單
只要買布時度好尺寸 可以好簡單就完成到架喇 :)
哈 ~ 呢個係我半年前第一個自製既手機套喇
用左好耐lu, 到今日已經黑mi mi喇
又要準備做一個新既比自己 ^^
今次既手工, 一定要比之前進步先得 :)
今晚睇新聞透視 講述香港人既快樂指數
可能係生活節奏急速 令人生活太緊張而不快樂
其實每個人怎樣從生活中得到快樂 快樂指數既量度都不同
而我就好簡單喔, 能夠每天都開懷大笑 就係最快樂不過喇
咪整既朱古力, 送比咪之大大既生日禮物
但由我負責食晒 .... 開心, 就係咁啦 XD
終於試用左個矽膠朱古力模喇, 好易用呢
可惡的星期一 本應沒有星期一候群症
帶著病回工作崗位 吃藥過後整個人都好唔舒服
心裡亦好唔舒服 頭暈暈 連說話既力氣都沒有
午飯時候足足睡了個半鐘, 同事們都讓我靜靜地休息
雖然仲未好番, 但藥力真係好影響工作
決定 聽日唔食藥 > <
咿呀 大感冒喔
醫生開左好多安眠藥比我 >< 眼瞓得要命
就算係感冒 都要對自己好d XD
煮一碗"懶人薑母茶湯圓"嘆下先 :)
材料 : 灣仔碼頭芝麻湯圓 & 台灣四合一薑母茶 !
上回介紹過台灣買回來既薑母茶, 真係好味 而且只需跟湯圓一起煮
懶人岩晒 :)
薑母茶既成份有 黑糖 / 老薑 / 紅棗 / 桂圓
可以預防感冒 (但已經感冒啦), 改善神經衰弱 (哈 睇黎要日日飲了)
來一口 通通鼻哥, 都唔錯呢 :)
又係咪之推介 !
嗯嗯 試過自己整既馬蹄糕喇 都OK呢 :)
原來唔算過多馬蹄喇, 太少反而無咩"口感" hahaha !
就來分享下食譜
材料
水 800 ml
馬蹄 450g
馬蹄粉 300g
冰糖 280g
做法
1 先將馬蹄去皮, 切粒
2 500ml水煮滾, 加入冰糖煮溶
3 將餘下300ml水加入馬蹄粉開勻, 慢慢加入冰糖水 慢火攪拌至均勻
4 加入馬蹄拌勻, 收火
5 倒入糕盆, 用錫紙蓋好, 大火蒸 30分鐘即成
咪之小小意見
馬蹄粉漿一定要慢慢地加入冰糖水, 唔可以心急
以上材料中, 水既份量可以多加一些, 會可以軟身一d
如果想顏色金黃d, 試下用上黃糖
(可以在煮溶糖既時候試試味, 好甜就岩架喇, 因為仲有馬蹄粉漿未加ma ^^)
謝謝咪之大大既食譜分享!
新年就到喇 ~ 都想試下製作賀年食品
細個既時候 屋企人整賀年糕點 我最多只會刨刨蘿蔔 (就係咁多!!)
大個喇 ~ 到我自己親手做下 雞手鴨腳既作風睇黎都沒法改到 哈哈!
今次試下整馬蹄糕 拿著家姐比我既食譜 一邊整心裡總係好多問號 嘻嘻
MINI 版馬蹄糕 驚唔成功 所以份量先減半 試左成功又好味
就會大製作喇 :)
選用左冰糖 不過食譜說1/4杯 真係唔知有幾多 所以只係估計份量
食譜又說需要小火煮至透明 但好難煮呀, 白色糊狀時已需要收火了
不過蒸完後都OK, 而且仲好多好多馬蹄 !! 會否太多呢 ??????
一個充滿問號既製作過程 嘻嘻 聽日煎黎試下就知好味與否喇 ^^
好味既話 ~ ~ ~ ~ 就整D比家人過節 ^^ 仲可以提供食譜 嘻 !
今日終於都可以早D收工 所以去左二記入D貨
主要係幫家姐買電子磅 同埋買糖膏試下整D花樣
之不過我又忍唔到手 見到兩個心水既矽膠模
一個心型, 一個就正方型 唔可以太貪心呀 只可以二選一
買左呢個 ...... SIZE都幾岩我用呀 :)
仲有好多情人節同新年既用品買呢 都係唔買太多野回家喇
執執廚房 ~ 有件幾好用既東西介紹下
毛巾一條 ! 好無聊 又好師奶吧 XD
但真係幾好用架, 早前係東門既"兩蚊店"買左兩條
看它老土款 咁平應該好快爛 所以只買兩條
不過其實一點也不差 清洗十分方便 今次再北上想買多d回來
已經搵唔到了 :( 如果有blog友發現佢既足跡 話我知 :)
記著, 佢d花又老土 包裝又簡單的 就係師奶Mi既介紹喇 !
今日決定北上 有兩件事要做既
1. 訂造窗簾 準備將屋企換下look
2. 為家姐看看有沒有平既電子磅
假日既東門 真係好多人 都無咩mood買野, 成日要小心包包 !
所以就先去窗簾市場選布料先
選到心水既玫瑰花款同格仔款, 襯起來都幾好睇 :)
之後就去廚安居睇下有沒有電子磅 ..... 有既, 不過價錢唔比HK平
都係番二記買好了
之後就去左入少少烘焙用品 (哈 ! 早前買左咁多 都仲買 XD)
女人仔, 係咁架喇 XD
今次去多番少少蛋糕杯款式 其實二記都有呢d款 不過呢度買就平d
所以入左d貨比係外國既家姐 佢成日整蛋糕比小朋友
呢d款就岩晒啦 :)
曲奇模 主要係入定少少 想遲d有機會學整鳳梨酥時用既
又係二記有既 不過一場來到而且價錢又一樣, 是但啦 哈哈
係買野既時候發生左少少意外
見到一把刀 好奇地拿上手 結果 ....割傷左隻手指 流血呀 > <
(只怪自己多手啦 認真羞家)
仲有大把時間等窗簾又唔想行 就不如去dup下骨
結果 .... 係拆骨 :( 不停叫 ..... 唔得 好痛好痛
個姐姐笑言我下下到骨 叫我增肥 :( 因為dup骨而增肥 ?!?? 唔好掛
回到家 欣賞下新窗簾 hm.....幾靚 !
遲d先掛上 仲未到新年ma ^^
新年快到喇 ~ 都有d idea 想整d咩 :)
主要係整馬蹄糕先 節日ma ^^
哎呀 ...... Ayu2010日本公演SCHEDULE出左喇
但係東京既公演係七月 唔想七月去喔
捱貴機票 捱熱天 又怕打風
大板就五月開 不過大板個邊唔熟 怕買唔到飛呢
心大心細 今年好唔好再去睇 (等埋追加公演Schedule先算lu)
2006, 2008, 咁2010.....都應該去睇啦 哈哈哈!
如果今年有Asia Tour而台灣又有, 我估會放棄去日本
雖然日本氣氛比較好, 不過又想買到靚位而要捱黃牛飛
實在肉赤喔 :(
I love Mi !
推介推介 ! 旅行之前已經買下來 一直未有時間認真聽
今日得閒d 睇晒成隻DVD 好好聽
信者得愛, 阿門, 有一種快樂 ....... 好聽呀
鍾意Sammi好耐喇 ^^
台北跨年之旅 - 手信篇 Part 2
今日終於的起心肝開喼喇 ~ 全喼都係烘焙用品 哈
下次都係帶個紙箱寄倉好了 :)
一開......哈 ! 點解仲有一份手信在內
連買左都忘記左 :) Life is beautiful .... 就送比家姐啦
好 ~ 來看看我既一喼玩具啦
我既手作材料 ~ 係永樂市場買左一D布料 最鍾意就係D防水布
HK 實在難找到呀, 其他既麻布都好靚好靚
希望可以整d手機袋同化妝包包 仲有小熊媽媽買既其他用料
包裝廣場買既貼紙同紙袋 紙盒等等 上次買既都未用晒
今次同朋友&家人一起分享, 每人一d ...... 其實都好多架喇 :)
WOW 我至鍾意買既蛋糕紙杯, 係洪春梅度一口氣狂買
老闆娘讓我慢慢買, 買下多d ... 買下又多d
有正方形, 有長方型, muffin cup case, 賿杯仔都唔錯呀 香港既好多都沒有花款
包裝賿袋都買好多呀 一pack有一百個 好岩用 心型既袋仔就可以放曲奇
大大小小既...不停放入籃
由於太重既關係 ...... 夠了
之不過買完後決定坐的士回酒店 ..... 早知繼續啦 哈哈哈 !
唔緊要唔緊要 ..........
I'll be back !!!!!!!
今次既旅程真係十分滿足
係未來既日子 咪再upload早前既台灣之行
台灣 (好好玩呀 XD)
旅程完畢 ~ 當然買左少少手信回來
先來分享下美食先
今次買既並不算多 ~ 只係為家人買回來
朋友大多數都沒有為佢地準備
淡水既即沖咖啡 屋企人特別鍾意
忠孝敦化站糖村既牛乳糖 怎可以唔買呢 ^^
XO醬...唔知點解會買 哈哈 不過都幾鮮味
當然唔少得鳳梨酥 綠豆糕啦 今次試維格既 都幾好呀
家人好鍾意 因為入面有粒粒既鳳梨肉
今次有新推介 就係淡水買既黑糖薑毌茶 係街最後既一檔
試左一口 ~ 好夠薑呀 ! 立即掃左三包回來 之後不停在場添飲 哈 !
(有點後悔買得太少 唔夠分比家人 !)
仲有呢個係機場買既黑糖麥芽餅
餅係咸咸地, 再咬一口硬硬既麥芽夾心 .... 亞蘇個句 : 好味到不得了 !
(當然....又後悔只買了一包啦... 好似.....大約NT$100 忘記了)
呢兩個係今次既新驚喜
台北市動物園既小手信 實在好可愛 不過我都只係選擇左團團圓圓既禮物
POSTCARD, 鎖匙扣, 熊貓八達通套, 好得意呀 :)
繼續為家人買手信, 化妝包包 我識做呀 ! 不過見呢個咁靚 都係買下來
仲有香港好少見D 咁 KAWAII 既玩具錶 一口氣買幾隻回來送比家姐&自己
係西門町買, 仲可以講價 好抵呀
為自己買少少日用品 洗手液樽真係好過癮 仲好HELLO米米用品
糖果扭蛋 買來想TUM下朋友開心......都幾SWEET呀 :)
淡水既小手信 同埋MAMI最鍾意既招財貓 (老人家喜歡喔)
其他既就係我玩夾公仔機既收穫
別看輕我 ...杯同手機蠅都係一take OK ... 今次叻左 :)
屋企人笑言既大細面既公仔 送比臭B既
最後係機場見到HELLO米米變色杯 好想好想要呀
忍不住帶佢回家變變變 !
雖然買回來既大多數係得意野 好稚氣
但旅行最緊要開心 就放肆下吧
........ 下回 手信篇之烘焙/手工買買買 .... 待續 :)
台北跨年之旅 - 第四天 2.1.2010
每次旅行既最後一天 通常都最簡單
想去邊就去邊 早上收拾好行李CHECK OUT 後
嘆嘆早餐 就去西門町行下 太早去到的話 太多舖都未開
都買左少少手信 想想下~哈 今次未去小熊媽媽買野
所以就坐的士去購物 買定一D包包手作仔用品 :)
然後就去番台北車站作最後努力 ~ 買下野
吃過PEPPER LUNCH後 行來一會就回酒店取行李去機場
今次坐CX 回港 亦係第一次用terminal one
聽說terminal one 比較多舖頭 ..... 係呀, terminal one有幾間食品舖頭
可以比我再買多d手信回來 (有隻黑糖餅乾要推介喔 !)
.... 下雨了 但總結這數天, 天氣都算不錯了 (只係有點凍吧)
台灣 ~ 我好快又會再來 嘻
下一回.....手信篇 待續 :)
1.1.2010 跨年之旅第三天
嘻嘻 越來越遲起身 可能因為今次沒有去郊區 所以唔駛趕火車
第三天 去淡水玩 淡水係每次都會去既地方 鍾意佢多野食&手信買 :)
呢日係假期 好多家庭都選擇來淡水玩 好多人
先坐下來 吹吹海風 影下相 D小朋友玩得好開心 一於偷拍下
坐船去八里都好多人排隊 不過今次我都唔去 只在淡水老街玩
吃下小食 花枝丸 尤魚
同埋今次試既花生雪糕PANCAKE 佢地鍾意加條蔥花入去
我就怕怕了 大嚷:別要別要 XD
係淡水買左家姐鍾意既咖啡 同薑毌茶 同埋小手信
不知不覺已到下午四點了 仲要趕去圓山買鳳梨酥 要走喇
買完手信後 回酒店放低晒後 就去國父紀念館紅蟹將軍食晚飯
海鮮火鍋 任食放題 真係好好味 食幾次長腳蟹已經夠本了 牛肉也不錯
又可以嘆埋咖啡 雪糕 朱古力曲奇都好味
曲奇放係雪櫃都係得架 哈哈
呢餐真係唔錯 每人NT$800 食物新鮮 抵吃 :)
吃完晚餐 原本去LUXY 見識下 但好似著得太casual 唔太適合
所以最後都沒有去 只係去埋糖村買糖
早了點回酒店 收拾行李
...............第四天 待續 :)
台北跨年之旅 - 第二天 31.12.2009 Part 2
去完動物園玩之後 之後就去左中山站食午餐
睇天書有間易牙妙手魚丸店 好似都幾好味
就試一試啦 都唔算難搵 ......係一條巷入面 不過 ........
一看店面 好似有D ....... 唔係好想入去 有點舊 又只有一個客
心想.....唔通唔掂當 ?!?!? 都來到了, 就試一碗面吧
嘻 又唔差bor 試左一個魚丸羹冬粉 同埋一d小吃 可口既可樂一支
魚羹十分好味, 而且魚丸亦都很好 (彈口的) 小吃部份亦非常入味
真估唔到 ~ 有驚喜 ^^ 之後亦多左好多台灣街坊來吃
(我係一粒幸運星, 次次都可以搞旺場 哈哈)
午餐來說都可以一試 別要因為一些裝潢而放棄美食喔 :)
食完之後 就去左包裝廣場買包裝用品 今次正式來講 係烘焙購物之旅 哈!
........又忘記影相 :( 掃貨完畢 就回台北車站走走 再到忠孝新生站
看看遊戲GAME同藍光碟 遊戲GAME比香港還要貴 沒有什麼特別
到晚飯時間喇 ~ 回酒店休息一會後 便去國父紀念館站食飯
原本想吃紅蟹將軍 但FULLY BOOKED 沒法子啦, 31號一定爆滿
只不過連WALK IN 等都唔得 所以要再選其他
人山人海呀 .... 最後都找到地方晚餐 不過都等左一個鐘 :(
WAITRESS 好 NICE 見我地係遊客 不停同我地傾
食左古奈屋日式 SET DINNER 抵食&OK 一個SET約NT$400
最OK係同一班台灣人坐同一張大TABLE
看佢地談天說地 可以感受下佢地過節既氣氛 都幾好呀 :)
吃飽後就立即去晚會會場玩喇
係國父紀念館外 有好多車仔檔賣野食 野玩
仲有小煙花可以放 當然要買來玩啦 會場真係十分多人
坐的士時司機大哥說會有三 四十萬人 嘩 !!!!
一於找個理想位置看倒數 位置不錯 而且選既地方唔太迫
坐下來等 又同台灣人一起玩大老二 時間好快就到COUNTDOWN喇
新年快樂 ~ 煙火好好睇呀 不過間中停了下來
影煙花十分難 唔識影 :( 用左傻瓜MODE影 哈哈哈
TAIWAN "UP" !!!!
回港後睇D新聞 笑言 TAIWAN "UP" 這字語令外國人難以理解
我只理解 我玩得好開心 嘻嘻
COUNTDOWN完畢 就跟人群去捷運站回酒店
太多人喇~跟著人群應該沒錯吧.....結果......走到大安站 @@
又一天喇
第三天.......再續 :)
31.12.2009 台北跨年之旅第二天 Part 1
瞓到八點幾九點先肯起身
吃Dante早餐 .... 要喝朱古力咖啡 所以都係選擇食西式早餐 加一件多士
hm.....真好味 ..... 好 hea !!! 哈哈 !
早餐過後 就去動物園玩喇
動物園線既列車特別d .... 特別少位坐 呵呵
落著毛毛細雨 都唔影響我既心情 又吃下小食先
來看看動物喇 好多好多不同既動物
呢度只係少數相片呢 ^^ 別以為看動物好悶
其實都ok架, 只係有d地方臭dd 地方好大
最好係到左先去坐觀光車 然後向下走, 咁會舒服d
真係大開眼界 幾好玩 :) 仲買左少少團團圓圓精品
玩完已經兩點喇 就去吃午餐喇
第二天 下半場 ..... 再續 :)
咪2009既第三次旅行 - 都仲係台北 哈哈 !
點解咁鍾意去台北玩??? 因為又平又多野食 嘻~岩晒我喇
雖然今次行程十分簡單 .... 但都玩得好急趕 可能每天都唔願起身吧 XD
30.12.2009 一早既清晨 5:40am..... 唔知醒 :(
幸好CALL左的士 的士大哥做左鬧鐘 哈哈 梳洗過後趕快出門喇
帶埋我既青蛙王子 GOGOGO !
十點左右 到喇到喇 第一站先到酒店 CHECK IN 可惜未有房間
今次住係南京東路既王朝大酒店 係小巨蛋旁
下次如果Ayu去台灣開 Asia Tour 我識去喇 XD
台北車站既酒店全滿 未能選到心目中既酒店
不過王朝都好大 只係沒有台北車站咁方便姐
放下行李 去醫醫肚先 去左永康街食永康牛肉面
hm.....都唔錯 湯底幾好味, 而且小吃都唔差
食完都想吃一碗冰 之不過....天氣有d凍 算啦~仲有好多機會吃冰
去走走 lu .... :)
都一場到左中正紀念堂站, 就不如去中正紀念堂行下
而且有個恐龍展做緊, 一於去下先
行完玩完, 之後就坐的士去迪化街買布 同埋洪春梅買烘焙用品
可惜 .....太開心 一張相都沒有影低 只顧買買買 !
哈哈 終於買左好多好多回來 :)
買完已經天黑了 所以決定坐的士回酒店放低戰利品 再去士林吃吃吃 !
士林夜市, 每次到台北都一定去, 因為有野買有野食有野玩 :)
今次全部食d之前未有試過既 紅豆冰都唔錯呀
見好多人排隊等位, 一於跟跟跟 幾凍都要食 :)
玩下夾公仔 邊行邊吃, 好快就十一點了, 要回酒店休息喇
第二日去動物園遊玩 :)
.................. 再續 XD
